كــــــــل ثـــــورة و أنتم طيبـــيـــن !!!

        الثورة اللي حيلتي باااااظت .. الثورة دي فشلت لأن عيبها إنها كانت سلمية زيادة .. الثورة دي إتسرقت .. هو إحنا إستفدنا إيه من الثورة دي؟!! .. البلد خربااااانه .. حرااام عليكو بقه ماتولعوهاش أكتر من كده .. إنتو عايزين تخربوها روحو شوفو ليبيا و سوريا  الدستور أولاً .. الإنتخابات أولاً .. نعم للمجلس العسكري .. لا لحكم العسكر .. إحنا ال77% و طظ في النخبة .. إحنا النخبة و الشعب مش واعي.

كل الكلام ده هو الأكثر شعبية في كل مكان .. و انا مش ضد إن كل واحد يكون ليه رأي و يعبر عنه بس إمتى و إزاي ؟!!

من أربع شهور كان الشارع هو الحكم و كان في قانون طوارئ و حظر تجوال و مع ذلك الشارع فرض كلمته .. ليــــــه؟ .. لأنها كانت كلمه واضحه و موحدة.."الشعب يريد إسقاط النظام"

 سامع حد بيقولي : أصلاً النظام لم يسقط .. ممم خدني على قد عقلي .. كان في رئيس صاحب سطوة و بطش .. حرس جمهوري يتبعه مباشرة .. حكومة شفيق تابعه له ..أمن دولة ظل قادراً على المواجهه بعد يوم 28يناير .. إعلام موجه .. رؤوس أموال خاضعه .. حزب واطي يخدمه بالمال و التنظيم و القبليه .. كل الجيوش دي مقدرتش تدافع عنه و إتخلع في 18 يوم



 مش بس فقد شرعيته في الحكم .. ده فقد كل إحترام في نفوس معظم الشعب المصري .. متنسوش إن كلنا كنا بنقول قبل المجازر اللي عملها :إحنا بس نفسنا نشوف رئيس سابق .. يعني كان عندنا إستعداد نحافظ على إحترامه .. هو اللي ضحي بكل ما لديه علشان الكرسي و علشان مشروع التوريث
طيب بلاش دي .. كلنا كان عندنا إستعداد نوافق على عمر سليمان إنه يتولى الحكم مؤقتاً في الفترة الإنتقاليه .. و هو اللي ضحى بكل الثقه دي بدفاعه عن المخلوع و بإتهامه للشعب إنه غير جاهز للديمقراطية - خدو بالكو في ناس بتقول الكلام ده دلوقتي - إتحرق كارت عمر سليمان في قد إيه ؟ .. بجد و الله قد إيه وقت؟؟

 فــ 48  ساعة  أسقط الشعب شرعية عمر سليمان كنائب رئيس و كــ رئيس إنتقالي .. يعني إحنا شعب جبار و محدش كان قادر عليه .. أيوه محدش كان قادر عليه و حتى لو كان حصل إن الجيش كان ضرب يوم 28 يناير مكانش حيقدر يعمل زي ليبيا ولا سوريا عارفين ليه؟!!!

 علشان الثورة دي إستفادت من حاجه كانو بيعايرونا بيها 30 سنه الثروة البشرية .. ملايين مملينه .. رمت خوف السنين وراها .. مخافتش من الرصاص و لا القناصة و لا البلطجيه و لا العربيات الطائشة .. في لحظه الدم و الموت بقه شرف .. مين يقدر على دول ?!! 

 الإجابة : محدش .. ده اللي فهموا القائمين على المؤسسة العسكرية .. و يشكروا على كده .. حقنوا الدم .. و مقالوش إحنا الثورة.

تقولي المطالب لسة متنفذتش .. و النوايا مشكوك فيها .. و المحاكمات مؤجلة .. و التباطؤ تواطؤ ... و الثوار محكموش ... أقولك الفرصة متاحة .. المشكلة مش فيهم المشكلة فينا إحنا .. كلمتنا الواحدة إتفرقت و بقت  ألف كلمة و كلمة

 و بعد مكنا في الميدان كلنا واحد .. بقينا تيارات و إخوان و سلفيين و مسلمين و مسيحيين ....

 
كل ده و نسينا إن الحزب الواطي  فقد إسمه فقط .. لسه  منظم ’قبلي ’متخم بالمال ’نفوذ و علاقات متداخلة مع الأمن

لو فضلنا نخون بعض و نشتم بعض و نجهل بعض يبقى إحنا اللي خنا الثورة بشهدائها و جرحاها و ثوارها و شعبها اللي فرح بيها .. و إنداس عليه من الكل .. الشعب ده هو الضحية للإنفلات الأمني و لعجز الحكومة عن توفير مطالبه اليومية و آماله العريضه اللي بناها بعد الثورة .. و هو الضحية لمن يدعي إنه بيفهم و بيتهمه بالجهل السياسي و إنه ناقص توعيه.

نهدى بقه و نحاول نسمع بعض بدل ما كله بيتكلم و محدش بيسمع التاني .. نرجع تاني مصريين .. لا إخوان ولا سلفيين ولا ليبراليين ولا رأسماليين و لا إشتراكيين ... نرجع مصريين لحد ما نجيب مجلس شعب بإسمنا و رئيس نثق إنه هيجيب لمصر الثورة حقها .. دي هتبقى البداية الحقيقيه للفترة الإنتقاليه .. اللي إحنا فيه دلوقتي فترة جمود .. في الفترة الإنتقالية  دي نبقى نشد شعر بعض براحتنا .. قدامنا كام شهر على الإنتخابات مين عمل إيه؟!!! ..... سكتوا دلوقتي بعد كل الرغي اللي رغتوه