إيه شايف العنوان مش مظبوط .. إيه فيه حاجه غلط؟!! ... ليه بس .. أنا شايفه منطقي خالص هو مش كل حزب إتجاهه و أيدولوجيته بيتحكم عليها من تأثيره في العمل على الأرض و خططه للخروج من المشاكل اللي بيواجـهها .. يعني مثلاً يطلع حزب زي الحزب الوطني الديمقراطي كده و يقولي أنا إتجاهي ديمقراطي أقوم أنا مصدقه وش كده ولا أشوف ممارساته على الأرض ؟ .. طيب و لما يطلع زي ما كلنا شوفنا إنه لاوطني و لا ديمقراطي يبقى العيب في الوطنيه و الديمقراطيه ولا فيه؟!!
طيب لما يطلع حزب زي الوفد و يقوم يقولي أنا حزب ليبرالي و بدعم الديمقراطيه و إن الشعب هو مصدر التشريعات و إنه بيدعم الدولة المدنيه .. مطلوب مني أصدقه وش كده؟!! .. طيب لما ياخد فرصه نتيجه لتاريخ الوفد العريق من النضال و العلامات المضيئه في طريق الوفد سواء كان سعد باشا زغلول أو النحاس باشا .. و نلاقي حكومه فيها نائب رئيس الوزراء د.علي السلمي و أ. منير فخري عبد النور مش نقيم ساعتها عملهم على الأرض و طرحــهم السياسي؟!!
طيب لما يسكتوا يسكتوا ... و بعدين يطلعوا بوثيقة المواد فوق الدستوريه مش نشوف هما بيقولوا فيها إيه ... و خصوصاً لمـا يطلع د. السلمي و يقول إن الوثيقه دي لم يمارس عليهم أي ضغوط من المجلس العسكري لإخراجها.
أول خمس مواد من المبادئ كلام إنشا عن الديمقراطيه و إستقلال القضاء زي الكلام اللي كان في دستور 71 و اللي في الإعلان الدستوري و مدام مفيش آليات يبقى حبر على ورق
الماده السادسه بتتكلم عن التنميه المستدامه و الرفاه الإجتماعي و الكلام الحلو ده ... بس للأسف الكلام ده مش بيتحقق بالكلام و وضعه في الدستور مش بديل عن خطط حقيقيه و مشاريع قوميه على الأرض مش في الوثائق.
الماده السابعه .. قالك نهر النيل شريان الحياه .. تقريباً اللي كتب الوثيقه دي هو اللي كان بيكتب الحكم على ضهر الكراريس أيام زمان :)
الماده الثامنه .. مصر في أفريقيا .. لا بجد و الله .. مش معقول ده أنا كنت فاكرها جزيره منعزله ... لسه لسه التقيل جي..
الماده التاسعه .. ضمت في إختصاص القوات المسلحة جنب حماية الحدود و أمن الوطن حماية الدستور ... يعني إيه بقى حماية الشرعيه الدستوريه دي .. هي مش الشرعيه الدستوريه دي كلام علي عبدالله صالح بتاع اليمن .. و بعدين هما العسكر لما يبقى ليهم الإختصاص في حماية الشرعيه الدستوريه ده مش باب لتدخل العسكر في السياسه.. و أي مزنق هيتدخلوا فيه هيكون تحت مسمى حماية الشرعيه الدستوريه!!
طيب تعالوا نشوف فيها إيه كمان الماده الجميله دي ..
بالنص :
"ويختص المجلس الأعلى للقوات المسلحة دون غيره بالنظر فى كل ما يتعلق بالشئون الخاصة بالقوات المسلحة ومناقشة بنود ميزانيتها على أن يتم إدراجها رقماً واحداً فى موازنة الدولة، كما يختص دون غيره بالموافقة على أى تشريع يتعلق بالقوات المسلحة قبل إصداره." ... و تكرم د. السلمي بتعديل النص ده و شال "دون غيره"- كتر خيره الراجل بيتعب و الله-
يعني من الآخر كنا بنطالب بإستقلال السلطه القضائيه قامت الوثيقه عملت إستقلال بالسلطه العسكريه ... أكيد طبعاً السريه واجبه في الجيش لكن السريه حاجه و الإستقلال ده شيئ تاني خالص ... لما تبقى ماده تفصيليه كده فين الرقابه!!
الأحلى و الأجمل بقى إن آخر الماده بتقول إن رئيس الدوله ميقدرش يعلن الحرب
بموافقة مجلس الشعب بدون موافقة المجلس الأعلى ... يعني لو الرئيس و مجلس الشعب شاف خطر جامد البلد بتتعرضله يقوم المجلس قايلهم ... إنتو بتهرجوا أنا مش محارب .. إيه!!! مش محارب!!! .... إنتي جايه تشتغلي إيه!!!!!
الماده العاشره .. إنشاء مجلس أمن قومي يرأسه رئيس الدوله .. طبعاً مجلس منقوص الصلاحيه بنص الماده التاسعه ... يعني منظر ديكور كده.
باب الحقوق و الحريات العامه
ماده إحدى عشر ... كلام عام عن عدم التمييز و بعدين نقض لكل الكلام ده في نفس الماده بجواز إقرار بعض المزايا لفئات بغرض الحمايه ... هتفرضوا علينا الحمايه .. و الله حاجه تضحك :))
مواد لحد إتنين و عشرين إنشا في إنشا .. مممممممممم !!!!!
تعالوا بقه ندخل على التقيل ... معايير إختيار الجمعيه التأسيسيه .. المنوط بها وضع الدستور .. 80 عضو من غير أعضاء مجلسي الشعب و الشورى
طيب هيجيبوهم منين؟!!
قالك .. قوى سياسية وحزبية ونقابية ومهنية ودينية على النحو الآتى:
___________________________________
(١٥) من الهيئات القضائية ( ٤ المحكمة الدستورية العليا ، ٤ محكمة النقض، ٣ مجلس الدولة، ٢ هيئة قضايا الدولة، ٢ النيابة الإدارية) ترشحهم جمعياتهم العمومية.
في ظل قضاء غير مستقل و معرفة إن مجلس قضاء الدوله و هيئة قضايا الدوله و النيابه الإداريه كلها هيئات معينه من الأساس يعني 7 من أصل 15 معينين
___________________________________
(١٥) من أساتذة الجامعات على أن يكون من بينهم (٥) على الأقل من أساتذة القانون الدستورى يرشحهم جميعا المجلس الأعلى للجامعات.
طبعاً كده عرفنا السر في عنادهم في ثورة التطهير في الجامعه .. هيحتاجوهم :)
__________________________________
(١٥) يمثلون النقابات المهنية يختارون فى اجتماع مشترك لمجالس هذه النقابات.
_________________________________
(٥) عن النقابات العمالية ترشحهم الاتحادات العمالية.
طبعاً كلنا عارفين الإتحادات العماليه بتاعت الحشد في الإستادات
__________________________________
(٥) عن الفلاحين يرشحهم اتحاداتهم.
شرحه زي إتحاد العمال بالظبط
__________________________________
(٥) اتحاد الجمعيات الأهلية ( على أن يكون من بينهم ممثل لذوى الاحتياجات الخاصة).
لا و الله إحتياجات خاصه ... بجد د. السلمي إنت حد إنسان قوي :)))
__________________________________
(١) اتحاد الغرف التجارية. (١) اتحاد الصناعات. (١) جمعيات رجال الأعمال.
دول طبعاً اللي هيقولو البلد بتخرب إرحموناااااا بقى و مش بعيد يصممو إن عجلة الإنتاج لازم تكون مرسومه على غلاف الدستور الجديد
_________________________________
(١) المجلس القومى لحقوق الإنسان.
مش قلتلكو .. د. السلمي إنسااااان إنسااان
_______________________________
(١) القوات المسلحة.
حقها ولا مش حقها ؟!!!
_________________________________
(١) الشرطة.
............. <----كلام قبيح
__________________________________
(١) الاتحادات الرياضية.
مرشحكم مدحت شلبي من أجل دستور بروح رياضيه :)))
___________________________________
(١) اتحادات طلاب الجامعات.
يعيني يا إبني إيه اللي جابك هنا :))
___________________________________
(١) الأزهر. (١) الكنائس المصرية.
وحده وطنيه صحيح ... و الهلال في حضن الصليب ... و الكلام الحمضان ده
__________________________________
(١٠) شخصيات عامة يرشحهم مجلس الوزراء.
إحنا معندناش مجلس وزراء .... هما فين ... فين !!!!!!!!
__________________________________
وعلى الجهات المشار إليها ترشيح ضعف العدد للاختيار من بينهم.
بعد كل ده و هينقوا كمان .... من أنتم ... من أنتم!!!! .... يخرب بيوتكوا من أنتم!!
طيب أنا معنديش مشكله مع حملة دعم المشير رئيساً ... على الأقل ناس عندها مبدأ .. خلافي الوحيد معاهم إن المشير في الخدمه و إن العسكر هم القائمون بمهام رئيس الدوله .. لو المشير تنحى و لو العسكر رجعوا ثكانتهم ... ساعتها يرشح نفسه زي أي مواطن
لكن حضرتك يا د. سلمي تبذل المجهود الكبير ده علشان نرشق في دستور يمدد حكم العسكر و بعدين تقولي أنا ليبرالي ديمقراطي .... من حقي أقولك لو سمحت إحترم عقلي ... و روح رشح المشير وش و هاتها من قاصرها.
عشنا و شوفنا يا ولاد القوى الإسلاميه بتدافع عن الديمقراطيه و مدنية الدوله و بعض القوى الليبراليه بتعطي الشرعيه لحكم عسكري !!!!.... صحيح مصر بلد العجائب :)
يا مجلس يا عالي الله يكرمك يا رب
كفايه لحد كده ..... عودو لثكانتكم يرحمكم الله.
ليست هناك تعليقات:
إرسال تعليق